AZAM FC YAINYUKA BIDVEST WITS YA AFRIKA KUSINI, YAWEZA KUKUTANA NA ESPERANCE YA TUNISIA

Azam FC ya Tanzania Jumamosi imeonyesha umwamba ugenini baada ya kuwatungua wapinzani wao Bidvest Wits ya Afrika kusini kwa magoli 3 kwa bila katika mechi ya raundi ya pili ya Kombe la Shirikisho ikiwa mechi ya mkondo wa kwanza.

Bidvest Wits waliingia uwanjani kuikabili Azam FC huku wakiwa na rekodi ya ushindi mnono wa jumla ya mabao 9 kwa 0 dhidi ya timu ya Light Stars ya Seychelles waliyoiondoa katika mzunguko wa kwanza.

Mechi hiyo iliwapeleka Azam FC na Bidvest Wits bila kufungana katika kipindi cha kwanza, lakini kipindi cha pili kilitumiwa vyema na Azam FC ambapo walizifumania nyavu za wapinzani wao mara tatu ndani ya dakika 9 tu.

Alikuwa ni Salum Abubakar ambaye alifungua ukurasa wa magoli pale alipoachia shuti la mbali katika dakika ya 51 na kuandika goli la kwanza, dakika tano baadae Shomari Kapombe aliifungia Azam FC bao la pili na mshambuliaji John Bocco alifunga ukurasa wa magoli kwa kupachika bao la 3 katika dakika ya 59. 

Bidvest Wits watakuwa wakiupanda mlima katika mechi ya pili ya marudiano itakayopigwa mwishoni mwa wiki jijini Dar es Salaam ambapo watahitaji kufunga mabao kuanzia 4 kwa bila ili waweze kusonga mbele.

Mbabe baada ya mechi ya marudiano kati ya Azam FC na Bidvest Wits atakutana na mshindi wa mechi ya Esperance ya Tunisia na Renaissance ya Madagascar.

Katika mechi ya mkondo wa kwanza iliyopigwa Jumamosi nchini Madagascar timu ya Esperance ya Tunisia ilishinda ugenini kwa magoli 2 kwa 0 dhidi ya Renaissance.

Kwa matokeo ya mechi za mkondo wa kwanza kuna uwezekano mkubwa wa Azam FC kukutana na timu  machachari  ya Esperance ya Tunisia.

 

MATOKEO YA KOMBE LA SHIRIKISHO BARANI AFRIKA ( CAF CONFEDERATION CUP) 

JUMAPILI 13 MACHI, 2016
1.	Al Ittihad	1-0	Medeama
2.	FC Saint Eloi Lupopo	2-1	El Ahly Shandy
3.	Nasarawa United	1-0	CS Constantinois
JUMAMOSI 12 MACHI,2016
1.	Kawkab Marrakech	3-0	Barrack Young Controllers
2.	Africa Sports d'Abidjan	0-2	Enppi
3.	Bidvest Wits	0-3	Azam
4.	Misr Makkassa	3-1	CS Don Bosco
5.	Mouloudia Club D'oran	2-0	SC Gagnoa
6.	Vita Club Mokanda	0-0	Police F.C
7.	Sagrada Esperanca	1-0	Liga Desportiva de Maputo
8.	Renaissance FC	0-2	Esperance
9.	Sports Club Villa	4-0	JKU SC
10.	Atletico Olympic	0-2	C.F. Mounana
11.	Harare City	1-2	Zanaco
12.	Stade Gabesien	2-1	AS Kaloum
IJUMAA 11 MACHI,2016
1.	UMS de Loum	1-1	Fath Union Sport